فتاة العرب

فتاة العرب (1920 - 27 يوليو 2018)
طالع أيضاً...
السيرة في ويكيبيديا

فتاة العرب هو لقب للشاعرة الإماراتية عوشة بنت خليفة السويدي (1339 هـ / 1920م - 14 ذو القعدة 1439 هـ / 27 يوليو 2018م) من رواد الشعر النبطي الإماراتي عرفت سابقا بفتاة الخليج من مواليد منطقة المويجعي في مدينة العين (أبو ظبي) وكانت من سكان دبي. اعتزلت الشعر في أواخر التسعينيات وظلت تروي أشعارها في مدح رسول|الرسول ﷺ.

اقتباسات

«يا دار لو يمشي لي البيب مالي ابقيظج شفّ واسناع

لكن رّبي له تكاتيب والاّ الخلا وافيويه إوساع

لوانا مقيّظ في عراجيب آخير من طوفات وجلاع

بين امغلس عرش او محابيب وغرايسٍ بلباسمٍ أيناع

وانهار تجري في دواعيب يشفي هواها لي به أوياع

ما شفت لك يا دار طرّيب غير الذّي يرجون لانفاع

والاّف لي يلقى المطاليب إيشوم عنج أو يرمح القاع

قيظٍ مليل أو شين وتعيب يلفي عقب غيبه أو مرباع

نتشافقه عند اليلاليب ومن الّرطب خلف الله أشباع

ما همّني بيع أو تسابيب حشا ولا للّربح طمّاع

والشيّ لي مكتوب في الغيب ياتي ورزق الحيّ ما ضاع

كلّ على جزل المواهيب لي يستجيب الدّاعي اسراع »
«قزّرت ليلي في هواجيس يوم الخوالي ذهّل انعوس

جنّي ربيطٍ في المحابيس عليه ترقب جند محروس

بي وجد حبّ العامري قيس باشواق ليلى هوب مدسوس

ظبيٍ من الخود المكانيس لي له ابطور الزّين ناموس

حطّ ابحشايه عرش بلقيس وله امعلوقي كرس إيلوس

يسنيك عن نور الفوانيس بّراق خدٍّ جنّه اشموس

لو ما تزيّن بالملابيس عليه نور الحسن ملبوس

حشيم عن تبع المدانيس لي ما يبيع الطّبع بفلوس

يا عود موزٍ في مغاريس أنعم من الدّيباج ملموس

لك في حشا قلبي رواسيس جنّك على لفواد معكوس

سلام يا حلو التّجنّيس لي مالكم في العالم اجنوس

أنا عقبكم حالتي ليس حال الذّي في الكوت محبوس »

«يا آية الحسن لي به تحكم اشروعه مالج نظيره وانا في القول بطريها

أعلامكم في مجال الزّين مرفوعه يا آل مكتوم وانتي قدوةٍ فيها

فيج المعاني بوصف الزّين مطبوعه في صورةٍ صاغها بالحسن باريها

يا بنت لي كلمته في الحكم مسموعه وعلى بعيد المدى كلٍّ يلبّيها

أبوج لي فيج حبّه زايد أولوعه عليج يا نور عينه لي يداريها

يهدي لج الشّوق لو من لمة اصبوعه واشفاق حبٍّ عليه القلب يمليها

يا حصّه الغزّر لي بالعزّ ممنوعه منجوبةٍ لا خلت من شوف غاليها

أشوف لرضاج كلّ باذلٍ طوعه الأهل والدّار والسّكّان لي فيها

امتوّجه بالشّرف من عالي افروعه ولي جدّها العود بو مكتوم يكفيها

هذي العوايد عليكم هوب مبدوعه سوابقٍ يذكر التّاريخ ماضيها

مهضومة الكشّح ريّا القدّ مربوعه مملاية السّاق واطرافٍ تحلّيها

المسك ريحج وشمّ الفل والفوعه في وردةٍ زان فوق الخد ناديها

كم حاكمٍ فيج جّره قود مطموعه واتكاسلت به عزومٍ ما يواحيها

اسعيد دونج وراشد زاد مدفوعه وكلّ على الفوز بج نفسه يمنّيها »
«قل لي إلى ونّيت مسموح يا مستريح القلب لمريح

طوفان نوح أو محملي لوح امعلّي وشراعي ايشيح

لو نلت من ذا الشّي مربوح ما بات لي في الجاش تبريح

يا روح روحي دون مصروح خلّيتني لرماك تشبيح

واسهرت جفني فيك بالنّوح وجرّحت لي كبدي تجرّيح

وادعيتني جسمٍ بلا روح جنّه ولا لي عظمٍ اصحيح

خلّ الصّفا لي دوم مفتوح ولا تستوي في طبعك اشحيح

شفت الظّبا لي غيرك اسروح ولا ريت لي به بالي ايسيح

ممدوح زين أو طبع مملوح ذوق العسل والزّبد به ميح

ريمٍ ربا في عالي اسطوح المسك لاسود له منافيح

ما لبس تنّوره ولا اشلوح لبس المزرّي والمفاحيح

وين الزّباد الشّامي ايفوح مع دهن عود وخامر الرّيح

لي تاح قلبي في الهوى توح شبه القمر بين المصابيح

ومن التّخلقّ دوم مشروح فيه الأناسه والتّفاريح

بازاوره لو دونه انزوح سريه أو مسراح أو مراويح

ولو دون خلّي رمل وسيوح أو بطحٍ مسايلها ضحاضيح

لين أوصله ماهوب مريوح واعطيه من جاشي تصرّيح

ما يبات دون الخلّ مزيوح اللّي تشلّه هبّت الّريح »
«يا شوق في المعلوق بي عوق رسمه على لفواد نتّاق

يا كسر قلبي كسر مدقوق في ناعمٍ للبنّ خفّاق

على نديمٍ خذني إبّوق لزمٍ ولا هيّد بالارفاق

تزهي روايب كفّه اطروق بالملتفت والحجل غرّاق

والبلبكي ما ياك مدلوق في شارعٍ م الخد برّاق

يطرب هوى من هزّه الشّوق رنين خلخاله على السّاق

واللّبس سيدي نكلس الطّوق في جيده إيهلك العشاق

ببدل صلاتي صوبه اشروق لنّه خليلي شمس لاشراق

لولاه ملّت شرعي ابدوق عن ذا اليهام أو خشر لاسواق

يا رشيد باب الوصل مغلوق وش في حياتي غير لفراق

أصيح واتويّع شرى طوق على زمانٍ مابه الحاق »