صلاح جاهين
|
صلاح جاهين |
|---|
 |
طالع أيضاً...
|
|
|
علي رجلي دم .. نظرت له ما احتملت
علي إيدي دم.. سألت ليه ؟ لم وصلت
علي كتفي دم.. وحتي علي رأسي دم
أنا كلي دم .. قتلت ؟ ….. والا اتقتلت
عجبي !!
يا قرص شمس ما لهش قبة سما
يا ورد من غير أرض شب ونما
يا أي معني جميل سمعنا عليه
الخلق ليه عايشين حياة مؤلمة
عجبي !!
إيش تطلبي يا نفس فوق كل ده
حظك بيضحك وانتي متنكده
ردت قالت لي النفس : قول للبشر
ما يبصوليش بعيون حزينة كده
عجبي !!
إقلع غماك يا تور وارفض تلف
إكسر الساقية واشتم وتف
قال : بس خطوة كمان .. وخطوة كمان
يا اوصل نهاية السكة يا البير تجف
عجبي !!!
يا حزين يا قمقم تحت بحر الضياع
حزين أنا زيك وإيه مستطاع
الحزن ما بقالهوش جلال يا جدع
الحزن زي البرد ... زي الصداع
عجبي !!!!
في يوم صحيت شاعر براحة وصفا
الهم زال والحزن راح واختفي
خدني العجب وسألت روحي سؤال
أنا مت ؟ ولا وصلت للفلسفة
عجبي !!!
خرج ابن آدم من العدم قلت : ياه
رجع ابن آدم للعدم قلت : ياه
تراب بيحيا ... وحي بيصير تراب
الأصل هو الموت والا الحياة ؟
عجبي !!!
ضريح رخام فيه السعيد اندفن
و حفره فيها الشريد من غير كفن
مريت عليهم .. قلت يا للعجب
لاتنين ريحتهم لها نفس العفن
عجبي !!
ياما صادفت صحاب وما صاحبتهمش
و كاسات خمور وشراب وما شربتهمش
أندم علي الفرص اللي انا سبتهم
و الا علي الفرص اللي ما سبتهمش
عجبي !!
مع أن كل الخلق من اصل طين
وكلهم بينزلوا مغمضين
بعد الدقايق والشهور والسنين
تلاقي ناس اشرار وناس طيبين
عجبي !!