أحمد فؤاد نجم

من ويكي الاقتباس
اذهب إلى التنقل اذهب إلى البحث


أحمد فؤاد نجم
(1929 - 2013)

أحمد فؤاد نجم
طالع أيضاً...

Wikipedia-logo.png السيرة في ويكيبيديا

أحمد فؤاد نجم (23 مايو 1929 - 3 ديسمبر 2013) ولد في قرية ( كفر أبو نجم ) بمدينة ( أبو حماد محافظة الشرقية) في مصر ويعد أحد أهم شعراء العامية في مصر وأحد ثوار الكلمة واسم بارز في الفن والشعر العربي ولقب بالفاجومي المصري وبسبب ذلك سجن عدة مرات . يترافق اسم أحمد فؤاد نجم مع ملحن ومغن هو الشيخ إمام ، حيث تتلازم أشعار نجم مع غناء إمام لتعبر عن روح الإحتجاج الجماهيري الذي بدأ بعد نكسة 1967. في عام 2007 اختارته المجموعة العربية في صندوق مكافحة الفقر التابع للأم المتحدة سفيرا للفقراء.

Wikipedia logo اقرأ عن أحمد فؤاد نجم. في ويكيبيديا، الموسوعة الحرة

من قصائده[عدل]

مٌر الكلام[عدل]

مٌر الكلام

زي الحسام

يقطع مكان ما يمر

اما المديح سهل ومريح

يخدع صحيح ويغٌر

والكلمة دين

من غير إيدين

بس الوفاع الحر

كلمتين ( إلى مصر )[عدل]

كل عين تعشق حليوة

و إنتي حلوة في كل عين

يا حبيبتي أنا قلبي عاشق

و اسمحيلي بكلمتين

كلمتين يا مصر يمكن

هما أخر كلمتين

حد ضامن يمشي آمن

أو مِـآمن يمشي فين

..........................

شابة يا أم الشعر ليلي

و الجبين شق النهار

و العيون بحرين أماني

و الخدود عسل ونار

و اللوالي ( اللؤلؤ) بابتسامتك

يحكوا أسرار المحار

يللي ساكنة القصر عالي

إيمتى يهنالي المزار

كلميني يا صبية

طال علي َّ الانتظار

كلمتين يا مصر يمكن

هما أخر كلمتين

حد ضامن يمشي آمن

أو مِـآمن يمشي فين

.....................

قصرك المسحور غيلانو

أغبى من دود الغيطان

بعد مص الغصن الاخضر

ينحتوا عضم العيدان

و اللي خلى الأرض خضرا

و اللي خلى الدار آمان

عاش بجور ملو جوفه

مات بخوفه من الغيلان

طوّع الغلبان

ما قالش عن شقا العمر اللي كان

كلمتين بمصر يبقوا

هما أخر كلمتين

حد ضامن يمشي آمن

أو مِـآمن يمشي فين

....................

أدي كلمة من عذابي قلتهالك

باقي كلمة

من حنيني صنتهالك

في الضلوع من دنيا ظلمة

كنت خايف يلمحوها

يقتلوها في سكة ظلمة

سقسقت والنور بشاير بشاير

زهرة الصبار يا سلمى

يا نسيم الشوق يا طاير يا طاير

خد لمصر في الصبح كلمة

طول ما يبقى الركب ساير

بالبصاير والعينين

يبقى ضامن يمشي آمن

يبقى عارف يمشي فين

جيفارا مات[عدل]

جيفارا مات

جيفارا مات

آخر خبر فِ الراديوهات

و فِ الكنايس

و الجوامع

و فِ الحواري

و الشوارع

و عَ القهاوي وَ البارات

جيفارا مات

جيفارا مات

و اتمد حبل الداردشة والتعليقات

مات المناضل المثال

يا ميت خسارة عَ الرجال

مات الجدع فوق مدفعه جوّه الغابات

جسّد نضاله بمصرعه

و من سُكات

لا طبالين يفرقعوا

و لا اعلانات

ما رأيكم دام عزكم

يا انتيكات

يا غرقانين

فِ المأكولات والملبوسات

يا دفيانين

و مولعين الدفايات

يا محفلطين (1)

يا ملمّعين يا جيمسنات

يا بتوع نضال آخر زمن

ف العوامات

ما رأيكم دام عزّكم

جيفارا مات

لا طنطنة

و لا شنشنة

و لا إعلامات واستعلامات

عيني عليه ساعة القضا

من غير رفاقه تودّعه

يطلع أنينه للفضا

يزعق ولا مين يسمعه

يمكن صرخ من الألم

من لسعة النار فِ الحشا

يمكن ضحك

أو ابتسم

أو ارتعش

أو انتشى

يمكن لفظ آخر نفس كلمة وداع

لَجل الجياع (2)

يمكن وصية للي حاضنين القضية

بالصراع

صور كتير ملو الخيال

و ألف مليون إحتمال

لكن أكيد ولا جدال

جيفارا مات موتة رجال

يا شغالين ومحرومين

يا مسلسلين (3)

رجلين وراس

خلاص خلاص

مالكوش خلاص

غير البنادق والرصاص

دا منطق العصر سعيد

عصر الزنوج والامريكان

الكلمة للنار والحديد

و العدل أخرس أو جبان

صرخة جيفارا يا عبيد

في أي موطن أو مكان

ما فيش بديل

ما فبش مناص

يا تجهّزو جيش الخلاص

يا تقولو عَ العالم

خلاص

(1) محفلطين : متأنقين

(2) لجل : من أجل

(3) مسلسلين : مربوطين بالسلاسل

دلي الشكارة[عدل]

دلي الشكارة جنب الشكارة

و اقعد يا حفني ولعلك سيجارة

فكّـر شوية .. بالعيشة دية

إيه القضية إيه العبارة

من صغر سني

شقيان لكني

ما لط سني غير البصارة

....

و دخلت حارة من جوة حارة

و فكل حارة عليت عمارة

و سط المعامل بنا ومناول

بس المقاول كلني بشطارة

و لا خلى صرة ولا لقمة حرة

و العيشة مرة .. أخر مرارة.